حوارات ستات فاضيه

ليا زميلتين
واحدة مسيحية والتانية مسلمة
المسلمة بتحكيلى

وببص فى اصدقاؤه على الفيس
لاقيت واحده ضايفاه
وحاطة صورة مش عارفه ايه

المسيحيه دخلت معانا فى الكلام
ايه ده انتى بتشوفى الفيس بتاع جوزك؟
بمنتهى الانبهار

ردت المسلمة ايوة طبعاااااا
عشان الحق اى مصيبة قبل ماتحصل
ليه هو انتى مبتشوفيش؟
المسيحيه لا ده قافل كل حاجه بباسورد
موبايل ولاب وتاب
قافلها مايه ونور
المسلمة......ماهو كان عامل كدا برضو
فشكيت بقى وعملت خناقه ولازم تدينى الباسوورد
يعنى لازم تدينى الباسوورد

وخدته وارتاح بالى
سكتت المسيحيه........وافتكرت اكيد ان الحوار ده حصل معاها
بس جوزها مرضيش يريحها فى الاخر
بس راحت راده حتة رد

يا حبيبتى عندنا بنسيب الراجل براحته
خليه يشم نفسه
ماهو اصله هيلف يلف وغصب عنه هيرجع عندى
ديننامفيهوش طلاق ولا تعدد

اوبااااااااااااااا
المسلمة اتكبست وغصب عنها ردت وقالت
اااااه با بختكم

وانا فى النص ميته من الضحك

وجوايا استغراب من واقعهم مع ازواجهم
استغراب من راحة المسيحية ان جوزها هيلف يلف ويرجع عندها
ومش متضايقه خالص انه اساسا ازاى يلف ويشم نفسه على قولها
برا بيته

واستغربت المسلمة لما قاعده لجوزها على الواحده قال عشان تلحق المصيبه
قبل ماتحصل

ومستغربه الازواج دول اللى قافلين على حياتهم ومانعين زوجاتهم من مشاركتهم
اكيد فيه حاجات غلط بتحصل
وخايفين احسن زوجاتهم تشوفها

وضحكت اوى لما قفشت المسلمة المتزمته دى وهى بتعترف ان حقها مهضوم
فى الاسلام بالتعدد مثلا
وحسدها لستات الديانه المسيحيه على النقطة دى

حوارات ستات فاضيه بعيد عنكم

ماحدش عاجبه حاله